Ubutumwa Umuyobozi wa RUD Urunana (Rally for Unity and Democracy Urunana) ageza ku Banyarwanda ku munsi w’Ubunani w’Umwaka wa 2026.
Banyarwanda, Banyarwandakazi,
Kuli iyi taliki ya 1 Mutarama 2026, mw’izina ry’abagize RUD Urunana (Rally for Unity and Democracy Urunana) na RPR (Rassemblement Populaire Rwandais) Inkeragutabara duhuriye kandi dufatanije mw' Ishyirahamwe Riharanira Demokarasi (Congrès National pour la Démocratie - National Democratic Congress - NDC / CND) no mw’izina ryanjye bwite mbifurije Umwaka Mushya Muhire wa 2026. Uzababere muhire kandi ubabere uw’amahoro n’umugisha.
Banyarwanda, Banyarwandakazi,
Imyaka irenze mirongo itatatu abiyise umuryango FPR Inkotanyi bakaba bali impunzi z’abatutsi bahunze muli 1959 bali mu ngabo za Uganda bashoje intambara mu karere k’ibiyaga bigali. Babanje kuvuga ko bashaka gutaha ndetse ko bashaka demokarasi.
Nyuma y’amasezerano bagiranye n’ubutegetsi bwa Perezida Yuvenali Habyarimana, abanyarwanda bariruhukije bavuga bati tubonye amahoro, intambara irarangiye. Nyamara siko byagenze kuko FPR yakoresheje amanyanga menshi irasa indege yali itwaye umukuru w’igihugu cy’u Rwanda Perezida Yuvenali Habyarimana ali kumwe n’umukuru w’igihugu cy’u Burundi Sipiriyani Ntaryamira. Bo n’abo bali kumwe baguye muli iryo hanurwa ry’indege. Hakulikiyeho imirwano n’umuvu w’amaraso byaje kugeza FPR ku butegetsi. Kugeza uyu munsi nta mutegetsi wo muli FPR wali wabazwa uruhare rwe mu bwicanyi bwabaye kuko ba mpatsibihugu babakingiye ikibaba.
Banyarwanda, Banyarwandakazi,
Ya demokarasi FPR yavugaga ntayabayeho. Ahubwo hakulikiyeho kuyiniga burundu. Ubutegetsi bwaliho bwasimbuwe n’ubwami muli Republika irangajwe imbere na Perezida Paul Kagame. Yamaze kwicara ku ntebe y’ubwami, yubaka ingabo ze ku giti cye abifashijwemo na ba mpatsibihugu. Ubwo yatangiye kuzohereza mu mahanga kwica no gusahura. Aho zibanze cyane cyane ni muli Republika ya Demokarasi ya Kongo (RDC). Mu myaka irenga mirongo itatu zarasahuye zica abaturage baho. Ibisahu byose byazaniwe Kagame n’abambari be. Ubu Kagame ari mu bakire ba mbere kw’isi. We n’umuryango we n’abambari be nibo bafite umutungo hafi ya wose wo mu Rwanda.
Ibigo byari ibya Leta mbere ya 1994 n’ibigo byari iby’abikorera ku giti cyabo byahinduwe ibye cyangwa byarasenywe. Kuli ibi bigo Kagame n’abambari be bashyizeho ibindi kugirango basahure umutungo w’abanyarwanda bawujyana hanze. Kagame n’abambari be baguze amazu mu bindi bihugu, bafunguye konti muli banki hanze y’igihugu, byose kandi bigacungwa n’ikigo kitwa Crystal Ventures. Kagame, we ku giti cye afite indege eshatu ariko izo ni izizwi. Iyo agiye kujya mu mahanga Leta y’U Rwanda iramukodesha noneho ikamwishyura. Izo ndege n’indi mitungo yanditswe ku mazina y’abitwa “abashumba.”.
Banyarwanda, Banyarwandakazi,
By'umwihariko, Kagame n’abambari be bateguye umugambi wo kwigarurira igice cya Kongo ngo cyahoze ari icy’U Rwanda mbere y’ubukoloni yitwaje cyane cyane kurengera ubwoko bw’abatutsi ngo hamwe n’abaturage bavuga ikinyarwanda ngo kubera ko batotezwa n’ubutegetsi bwa Kongo ngo n'abagize umutwe w’inyeshyamba z’abahutu bitwa FDLR. Abashashakashatsi b’impuguke z’Umuryango w’Abibumbye ndetse n'Abandi bashakashatsi n'impuguke batabogamye baje gusanga ko impamvu nyakuri yo guteza akaduruvayo muri Kongo ali amabuye y’agaciro.
Nyamara ibi ntibyatumye Kagame n’abo bafatanyije bacika intege. Umutungo w’igihugu cyacu hamwe n’umutungo basahuye bawuguzemo intwaro maze bohereza urubyiruko rw’U Rwanda kujya muli Kongo kurwana. Hafi ya bose yohereje ntibazi icyo barwanira. Benshi yohereje bamaze kuhatikirira kuburyo irimbi rya gisirikare rya Kanombe ryuzuye hafungurwa ayandi.i.
Banyarwanda, Banyarwandakazi,
Ku gitutu cya Leta Zunze Ubumwe z’Amerika U Rwanda rwasinye amasezerano na Kongo muri uyu mwaka yo guhagarika intambara. Amasezerano akimara gusinywa Kagame yahereye ko yohereza ingabo gufata umugi wa Uvira. Kuri we amasezerano ntacyo aba avuze kuko ari umuntu wakuriye mu buriganya, ubujura, amanyanga, no kwica. Abagiye bamwibeshyaho bibwira ko ari umugabo w’inyangamugayo batunguwe no kubona ibyo akora. Nyamara abanyarwanda bo ntibatunguwe. Bo ntaho bafite uruvugiro. Dukore iki rero?
Banyarwanda, Banyarwandakazi,
Nitugerageze kumvisha abasore n’inkumi kutinjira mu gisirikari cya Kagame n’agatsiko ke kuko ntikigamije kurengera umutekano w’abanyarwanda ahubwo kigamije kurengera inyungu ze n'iza ba mpatse ibihugu. Kagame ni umwicanyi kabombo kandi koko akorana n’abicanyi n’ibisambo by’abanyamahanga. Kwiba, gusahura, amanyanga nibyo bimuranga.
Banyarwanda, Banyarwandakazi,
Abari mu gisirikari ni bashiki bacu, basaza bacu, barumuna bacu, babyara bacu, cyangwa abaturanyi, cyangwa se n’inshuti. Ningombwa rero ko dukora ibi bikurikira:
* Nitubasobanurire imigambi mibisha ya Kagame n’agatsiko ke.
* Nitubakangurire kwigumura no gutoroka,
* nitwime amatwi ibinyamakuru bye byirirwa biriririmba ngo Abatutsi bo muli Kongo nta burenganzira bagira, ngo Abanyamurenge nta burenganzira bagira. Kuki bashakira ayo moko uburenganzira? Abatutsi bo mu Rwanda se bo barabufite? Ko abica, ko bamwe babaye impunzi? Ko bamwe yabashubije kw’isuka?
Ngabo z’igihugu,
Ngabo zumva ko ari izi gihugu, ko zitari iza Kagame, nimukurikize umutima nama wanyu. Ibyo kurwana mu byanjye. Ubwicanyi bukorwa muli Kongo muzaburyozwa.
Mu kinyejana isi igezemo kwigarurira ibindi bihugu nkuko byahozeho ku ngoma y’ubwami bw’Abanyiginya n’Abega bategetse u Rwanda kugeza muli 1959 ntibikibaho. Ikindi, ba mpatsibihubgu bakomeje gukingira ikibaba umwicanyi Kagame ntibazakomeza kumuheka ku bitugu nkuko byagenze kuva muli 1990 kugeza ubu. Ubu iyo bamubonye, bamwakira nk’umurwayi w’ibibembe. Mwitonde. Umunsi mwagejejwe imbere y’ubutabera ntimuzavuge ngo mwishe mukurikiza amategeko ya Kagame. Iyo mvugo ntizemerwa imbere y’abacamanza. Aba-Nazis biregura mu rukiko rwa Nuremberg rwaciriye imanza abakoze genocide y’Abayahudi niko bireguye maze iyo mvugu abacamanza bayitera utwatsi. Nimukurikize umutimanama wanyu mwigaranzure umwicanyi. Nimutabare abanyarwanda muharanira demokarasi. Nimubikora abanyarwanda bazabavugiriza impundu. Muzaba mwanditse amateka y’intwari.
Banyarwanda, Banyarwandakazi,
Uyu mwaka wa 2026 uzatugeze ku butegetsi buhuje n’ibyifuzo by’abanyarwanda. Buli muntu ku giti cye narebe uko yagira uruhare mu mpinduka abanyarwanda bifuza kandi bategereje.
Twe abagize RUD Urunana (Rally for Unity and Democracy Urunana) na RPR (Rassemblement Populaire Rwandais) Inkeragutabara twibumbiye muli Ishyirahamwe Riharanira Demokarasi ( Congrès National pour la Démocratie - National Democratic Congress - NDC / CND) nicyo tubifuriza kuri uyu munsi wa mbere w’umwaka.
Imana ikomeze ibarinde kandi ituyobore mu bikorwa bifitiye Abanyarwanda bose akamaro.
Bikorewe i Washington, DC, Tariki ya 1 Mutarama 2026
Dr. Jean-Marie Vianney Higiro
Umuyobozi w’Urunana rw’Abaharanira Ubumwe na Demokarasi (RUD-Urunana)
Rally for Unity and Democracy /Ralliement pour l’Unité et la Démocratie
e-mail:
web: http://www.ndcnd.org
